❎💊 ვადაგასული პრეპარატები და კრიტიკული დარღვევები ვეტერინარულ კლინიკებში – სურსათის ეროვნულმა სააგენტომ კონტროლი ჩაატარა

სურსათის ეროვნული სააგენტოს თბილისის დეპარტამენტის ინსპექტორებმა და ვეტერინარული კონტროლის სპეციალისტებმა დედაქალაქში ვეტერინარულ კლინიკებში სახელმწიფო კონტროლი ჩაატარეს და კრიტიკული დარღვევები გამოავლინეს.

შემოწმებული 20 ობიექტიდან დარღვევები დაფიქსირდა 8 კლინიკაში: შპს „ახალი ვეტერინარული კლინიკა“, ინდმეწარმე დ. ს., შპს „ვეტ.არტ“, შპს „დტნბ“, შპს „ზარავეტ“, შპს „ვეტცენტრი ზოოპლაზა“, ინდმეწარმე თ.ძ. (ბიონიკა) და შპს „ვეტ. საავადმყოფო“.

ინსპექტირების შედეგად ორი კლინიკის საქმიანობა ინსტრუმენტების არასათანადო სტერილიზაციის გამო შეჩერდა. ასევე დაფიქსირდა:

• ვაქცინების შენახვის წესის დარღვევა,
• არარეგისტრირებული, ვადაგასული ან უვარგისი პრეპარატების გამოყენება,
• საქმიანობა ეკონომიკურ საქმიანობათა რეესტრში რეგისტრაციის გარეშე.

დარღვევის გამო ბიზნესოპერატორები დაჯარიმდნენ.

სურსათის ეროვნული სააგენტო აცხადებს, რომ ვეტერინარულ კლინიკებში, ვეტაფთიაქებსა და ზოომაღაზიებში სახელმწიფო კონტროლი უწყვეტ რეჟიმში გრძელდება. მიმდინარე წელს დაგეგმილია დაახლოებით 1500 ობიექტის შემოწმება.

აგრეთვე, სააგენტო მომხმარებლებს მოუწოდებს, ნებისმიერი დარღვევის აღმოჩენის შემთხვევაში დაუკავშირდნენ გარემოს დაცვისა და სოფლის მეურნეობის სამინისტროს ცხელ ხაზს 1501, რადგან რეაგირების გარეშე არცერთი შეტყობინება არ დარჩება.