🎭14 იანვარი – ქართული თეატრის დღე 🎭

14 იანვარს აღინიშნება აღდგენილი ქართული პროფესიული თეატრის დღე. სწორედ ამ დღეს, 1850 წელს, თბილისში მოწინავე საზოგადო მოღვაწეთა და გიორგი ერისთავის ხელმძღვანელობით, დაიდგა პირველი ქართული პროფესიული სპექტაკლი – „გაყრა“. ეს იყო პირველი და იმ დროისთვის ერთადერთი პროფესიული თეატრი საქართველოში.

ქართული თეატრის ისტორია შორეულ წარსულში იწყება: ნაყოფიერების ღვთაებისადმი მიძღვნილი უძველესი რიტუალური დღესასწაულები თეატრალურ ელემენტებს შეიცავდა, ხოლო უფლისციხეში აღმოჩენილი სათეატრო ნაგებობა ანტიკურ ეპოქასთან კავშირს უსვამს. შუა საუკუნეებში განვითარდა საეკლესიო თეატრი, ხალხური სანახაობები („ბერიკაობა“, „ყეენობა“) და სასახლის კარის თეატრი. XVIII საუკუნის ბოლოს ერეკლე II-ის სასახლეში გიორგი ავალიშვილის ხელმძღვანელობით შეიქმნა საერო თეატრი, სადაც წარმოდგენილ იყო როგორც ორიგინალური, ისე რუსულიდან ნათარგმნი პიესები.

ქართული თეატრი ყოველთვის მნიშვნელოვანი რგოლი იყო კულტურასა და საზოგადოებრივ ცხოვრებაში, ის აერთიანებს თაობებს, სულიერად ამდიდრებს საზოგადოებას და ინარჩუნებს ეროვნულ იდენტობას.