🕊 16 თებერვლიდან ყველიერის კვირა იწყება – მარხვის წინასამზადისი

მარხვის დაწყებას უშუალოდ წინ უძღვის ყველიერის შვიდეული. ამ კვირაში ოთხშაბათი და პარასკევი ხსნილია, თუმცა ნებადართულია მხოლოდ რძის ნაწარმი და კვერცხი – ხორცი კი კვირა საღამოს ვახშმის შემდეგ აიკრიბება სუფრიდან და აღდგომამდე აღარ იჭმევა.

ამავე პერიოდიდან მორწმუნეები იწყებენ განსაკუთრებული ლოცვის – ეფრემ ასური-ს ლოცვის – კითხვას, რომელიც დიდმარხვის განმავლობაში ყოველდღე, დილა-საღამოს იკითხება (შაბათ-კვირის გარდა).

ლოცვა იკითხება ყველიერის კვირის სამშაბათ საღამოს, ოთხშაბათ დილას, ხუთშაბათ საღამოს და პარასკევ დილას, ხოლო შენდობის კვირის საღამოდან – მთელი დიდმარხვის განმავლობაში, ვნების კვირის ოთხშაბათ დილის ჩათვლით (გარდა პარასკევ საღამოს, შაბათ დილა-საღამოს და კვირა დილისა).

ეს ლოცვა სინანულის, სიმდაბლისა და სულიერი განახლების გზაზე ერთ-ერთი უმნიშვნელოვანესი ნაწილია მართლმადიდებლური ეკლესიის ცხოვრებაში. 🕯🙏

————————

ლოცვა ეფრემ ასურისა უფალო და მეუფეო ცხოვრებისა ჩემისაო, სულსა უქმობისასა და მიმოწვლილველობისასა, მთავრობისმოყვარებისასა და ცუდად მეტყველებისასა ნუ მიმცემ მე (მეტანია). ხოლო სული სიწმიდისა, სიმდაბლისა, მოთმინებისა და სიყვარულისა მომმადლე მე მონასა შენსა (მეტანია). ჰე, უფალო და მეუფეო, მომანიჭე მე განცდა თვისთა ცოდვათა და არა განკითხვად ძმისა ჩემისა, რამეთუ კურთხეულ ხარ შენ უკუნითი უკუნისამდე, ამინ (მეტანია). ღმერთო, მილხინე ცოდვილსა ამას და შემიწყალე მე (მცირე მეტანია 12-ჯერ). უფალო და მეუფეო ცხოვრებისა ჩემისაო, სულსა უქმობისასა და მიმოწვლილველობისასა, მთავრობისმოყვარებისასა და ცუდად მეტყველებისასა ნუ მიმცემ მე. ხოლო სული სიწმიდისა, სიმდაბლისა, მოთმინებისა და სიყვარულისა მომმადლე მე მონასა შენსა. ჰე, უფალო და მეუფეო, მომანიჭე მე განცდა თვისთა ცოდვათა და არა განკითხვად ძმისა ჩემისა, რამეთუ კურთხეულ ხარ შენ უკუნითი უკუნისამდე, ამინ (მეტანია).