ცნობილი ქართველი კინორეჟისორი, სცენარისტი და საზოგადო მოღვაწე ელდარ შენგელაია დღეს 93 წლის გახდებოდა

ლეგენდარული რეჟისორის სახელთან არაერთი საკულტო ნამუშევარია დაკავშირებული, მათ შორის: „ცისფერი მთები, ანუ დაუჯერებელი ამბავი“, „ლეგენდა ყინულის გულზე“, „თოვლის ზღაპარი“, „თეთრი ქარავანი“, „მიქელა“ (ნოველა კინოალმანახში „წარსულის ფურცლები“), „არაჩვეულებრივი გამოფენა“, „შერეკილები“, „სამანიშვილის დედინაცვალი“, „ექსპრესინფორმაცია“, „Dog Rose“, „სავარძელი“ და „ჭა“. მისი ფილმები გამოირჩევა სარკაზმით, ღრმა სოციალურ-ფილოსოფიური ქვეტექსტებითა და გამორჩეული იუმორით, რამაც ისინი ქართული კინოს კლასიკად აქცია.

ელდარ შენგელაიამ განსაკუთრებული წვლილი შეიტანა არა მხოლოდ ქართულ კინოში, არამედ ქვეყნის კულტურულ და საზოგადოებრივ ცხოვრებაშიც. სხვადასხვა წლებში იგი საქართველოს კინემატოგრაფისტთა კავშირის თავმჯდომარე იყო. მას მიღებული აქვს შოთა რუსთაველის სახელობის პრემია, წმინდა გიორგის სახელობის გამარჯვების ორდენი, წმინდა გიორგის ოქროს ორდენი და თბილისის საპატიო მოქალაქის წოდება.

ელდარ შენგელაიას შემოქმედება და კულტურული მემკვიდრეობა მომავალ თაობებს კიდევ დიდხანს დარჩება ქართული კინოს ერთ-ერთ უმნიშვნელოვანეს სიმბოლოდ.