საგამოძიებო სამსახურმა სახელმწიფოს კუთვნილი დიდი ოდენობით თანხის მოტყუებით დაუფლების ფაქტზე 12 პირი დააკავა
საქართველოს ფინანსთა სამინისტროს საგამოძიებო სამსახურის ინფორმაციით, გატარებული ოპერატიულ-სამძებრო და საგამოძიებო მოქმედებების შედეგად, ყალბი დოკუმენტების გამოყენებით, სახელმწიფოს კუთვნილი დიდი ოდენობით თანხის მოტყუებით დაუფლების ფაქტზე, ორგანიზებული ჯგუფის 12 წევრი დააკავეს.
როგორც საგამოძიებო სამსახურის უფროსის მოადგილე ია ახალაიამ დღეს გამართულ ბრიფინგზე აღნიშნა, გამოძიება ეხება საქართველოს მთავრობის დადგენილებით დამტკიცებულ სასოფლო-სამეურნეო ტექნიკის თანადაფინანსების პროგრამას, რომლის ფარგლებშიც ფიზიკურ პირებსა და ინდივიდუალურ მეწარმეებს გადაეცემოდათ გრანტი 150 000 ლარის ფარგლებში.
გამოძიების ინფორმაციით, ჯგუფის ერთ-ერთი დაკავებული წევრი — სოფლის განვითარების სააგენტოს ყოფილი თანამშრომელი — სხვა პირებთან შეთანხმებით, აფორმებდა გრანტის მიღების მოთხოვნებს იმ მოქალაქეების სახელზე, რომლებიც რეალურად არ იყვნენ სოფლის მეურნეობაში ჩართული. აღნიშნული პირები დოკუმენტურად შეიარაღებული ტექნიკის შეძენას გეგმავდნენ რამდენიმე კომპანიისგან, რომლებმაც, საგამოძიებო მონაცემებით, ყალბი ინვოისები გასცეს.
აღნიშნული სქემით, ბრალდებულებმა სახელმწიფოსგან მოტყუებით მოიპოვეს 826 815 ლარის ოდენობით თანხა, რომელიც, გამოძიების ცნობით, არადანიშნულებისამებრ – პირადი სარგებლის მიღების მიზნით იქნა გამოყენებული.
მიმდინარეობს დამატებითი ღონისძიებები დანაშაულში მონაწილე სხვა პირების დასადგენად. საგამოძიებო სამსახურის ცნობით, შესაძლებელია გაიზარდოს როგორც დაზიანებული ბიუჯეტური თანხის ოდენობა, ასევე ბრალდებულთა რიცხვი.
გამოძიება საქართველოს სისხლის სამართლის კოდექსის 210-ე (ყალბი დოკუმენტის დამზადება/გამოყენება), 362-ე (ყალბი ოფიციალური დოკუმენტის გამოყენება) და 180-ე (თაღლითობა) მუხლებით მიმდინარეობს, რაც შვიდიდან ათ წლამდე თავისუფლების აღკვეთას ითვალისწინებს.
საგამოძიებო სამსახური საზოგადოებას გამოძიების მიმდინარეობისა და შედეგების შესახებ დამატებით ინფორმაციას პერიოდულად მიაწვდის.