რბოლა რუსთავში – დაბრუნებული ტრადიცია
რვაწლიანი პაუზის შემდეგ, რუსთავის საერთაშორისო ავტოდრომმა კიდევ ერთხელ უმასპინძლა წრიული რბოლების ეროვნულ ჩემპიონატს – და ეს დაბრუნება ნამდვილად ეფექტური იყო.
გახსნის ცერემონია განსაკუთრებულად დატვირთული აღმოჩნდა: საქართველოს ჰიმნი თავდაცვის სამინისტროს ეროვნული გვარდიის ორკესტრმა შეასრულა, ტრიბუნებზე კი სპორტის გულშემატკივრებთან ერთად მაღალი რანგის სტუმრებიც იმყოფებოდნენ – მათ შორის პრეზიდენტი მიხეილ ყაველაშვილი, სპორტის მინისტრი შალვა გოგოლაძე, მინისტრის მოადგილე ირაკლი მეძმარიაშვილი და რუსთავის მერი ნინო ლაცაბიძე.
„ეს იყო შესანიშნავი ღონისძიება. მადლობა საავტომობილო სპორტის ფედერაციას ასეთი მასშტაბური ტურნირის ორგანიზებისთვის. ჩვენ სპორტს განსაკუთრებულ მნიშვნელობას ვანიჭებთ და შედეგიც გვაქვს – ყოველდღიურად გვახარებენ ქართველი სპორტსმენები,“ – აღნიშნა პრეზიდენტმა.
მისი თქმით, 2012 წლიდან ქვეყანა მიზანმიმართულად მუშაობს სპორტის და სპორტული ფედერაციების განვითარებაზე, ხოლო მომავალში ყველა რეგიონში გაჩნდება მულტიფუნქციური სპორტული ცენტრები – სივრცეები, სადაც ახალგაზრდებს ჯანსაღი ცხოვრების შესაძლებლობა ექნებათ.
რაც შეეხება სპორტულ ნაწილს – ტრეკზე თავისი შესაძლებლობები 26 მრბოლელმა აჩვენა. აქედან 5 მოტომრბოლელი იყო, 21 – ავტომრბოლელი.
პირველ ეტაპზე გამარჯვება – სანდრო ქაჯაიამ მოიპოვა,
მეორე რბოლის საუკეთესო მრბოლელი – სანდრო თავართქილაძე გახდა,
მოტორბოლის ჩემპიონი – დავით რობანიშვილი.
რუსთავის ტრეკზე სისწრაფის, დინამიკისა და მაღალი კონკურენციის დღესასწაული შედგა – და ეს მხოლოდ დასაწყისია.
