ავარიაში მოყოლილი 8 წლის ბიჭი კვლავ მძიმე მდგომარეობაშია
4 ივნისს თელავში კვადროციკლით მომხდარი ავარიის შედეგად დაშავებული 8 წლის ბიჭი კლინიკაში მძიმე მდგომარეობაში რჩება. ბავშვის დედის, ხატია დუდაური, ინფორმაციით, მოზარდი მართვით სუნთქვაზე იმყოფება და სედაციის ქვეშაა, თუმცა ექიმები მის მდგომარეობაში დადებით დინამიკას ხედავენ.
დედის თქმით, ბავშვს თავის ქალისა და სახის ძვლების მრავლობითი დაზიანებები აქვს, რის გამოც სამომავლოდ შესაძლოა საზღვარგარეთ მკურნალობა და რეაბილიტაცია დასჭირდეს. ამ ეტაპზე მისი ტრანსპორტირება შეუძლებელია.
შემთხვევა 4 ივნისს მოხდა, როდესაც კვადროციკლი კედელს შეეჯახა. ავარიის შედეგად დაშავდა კიდევ ერთი არასრულწლოვანი, რომელიც უკვე გაწერილია კლინიკიდან და თავს კარგად გრძნობს.
ოჯახი საზოგადოებას მხარდაჭერისთვის მადლობას უხდის და აცხადებს, რომ ბავშვის მკურნალობისთვის ფინანსური დახმარება კვლავ სჭირდება.