EBS Korea საქართველოს შესახებ დოკუმენტურ ფილმს ამზადებს – გადამღები ჯგუფი ტურს ქვეყნის ტურისტულ ლოკაციებზე იწყებს
ტურიზმის ეროვნული ადმინისტრაცია სამხრეთ კორეის ერთ-ერთ ყველაზე რეიტინგულ ტელევიზიას – EBS Korea-ს მასპინძლობს. გადამღები ჯგუფი საქართველოში ახალი დოკუმენტური ფილმის გადასაღებად იმყოფება, რომელიც შემეცნებითი გადაცემის – World Theme Travel ფარგლებში მომზადდება.
🎥 ფილმისთვის გადაღებები მოიცავს ქვეყნის სხვადასხვა რეგიონის გამორჩეულ ლოკაციებს, მათ შორის:
- თბილისი – ძველი უბნები და ტურისტული ღირსშესანიშნაობები;
- კახეთი – რთველის სეზონი;
- სამცხე-ჯავახეთი – ფარავნის ტბა;
- იმერეთი – ოკაცეს კანიონი და პრომეთეს მღვიმე;
- სამეგრელო – მარტვილის კანიონი;
- სვანეთი – მესტია, უშგული, ქორულდის ტბა, ჭალაათის მყინვარი, შდუგრას ჩანჩქერი და შხარა;
- მცხეთა-მთიანეთი – სტეფანწმინდა, თრუსოს ხეობა და გერგეტის სამება.
📌 ვიზიტის ფარგლებში, კორეელი მედიის წარმომადგენლები ასევე გაეცნობიან ქართულ სამზარეულოს, ტრადიციულ ღვინოსა და კულტურულ მემკვიდრეობას.
EBS Korea-ს დოკუმენტური ფილმების რედაქცია იუთუბზე 5 მილიონზე მეტ გამომწერს და მილიონობით მაყურებელს ითვლის.
🎯 პროექტის მიზანია საქართველოს, როგორც მიმზიდველი ტურისტული ქვეყნის, პოპულარიზაცია კორეულ და საერთაშორისო აუდიტორიაში.