🧀 საქპატენტმა“ ადგილწარმოშობის დასახელება – „ნარჩვი“ დაარეგისტრირა

საქართველოს ინტელექტუალური საკუთრების ეროვნულმა ცენტრმა – „საქპატენტმა“, ასოციაცია „სვანური ნარჩვის“ განაცხადის საფუძველზე, ქართული ყველი „ნარჩვი“ ადგილწარმოშობის დასახელებად ოფიციალურად დაარეგისტრირა.

📍 „ნარჩვი“ – ეს არის ზემო სვანეთში, ძროხის მოუხდელი რძისგან დამზადებული ყველი, რომელიც ხის ყუთში მწიფდება და გამოირჩევა თხილისა და ნიგვზის არომატით. მის უნიკალურ გემოს განსაზღვრავს ტრადიციული წარმოების მეთოდები და განსაკუთრებული გეოგრაფიული გარემო – კავკასიონის ქედის სამხრეთ კალთები და მდინარეების ენგურისა და ცხენისწყლის ზემო წელები.

🕰 ტრადიციულად, ნარჩვის დამზადება მარიამობის შემდეგ – 29 აგვისტოდან ნოემბრის ბოლომდე მიმდინარეობს. მომწიფების პროცესი ხის ყუთებში გრძელდება, სადაც ყველი იძენს განსაკუთრებულ არომატსა და ტექსტურას.

🏛️ აღსანიშნავია, რომ 2020 წელს „ნარჩვის“ დამზადების ტრადიციას არამატერიალური კულტურული მემკვიდრეობის ძეგლის სტატუსი მიენიჭა.

🌍 ამერიკულმა გამოცემამ Saveur „ნარჩვი“ „ღვთის საჩუქარს“ უწოდა და აღნიშნა, რომ ის „ღრმა და ინტენსიური არომატის მქონე ყველია, რომელსაც კარაქის მსგავსი ტექსტურა და მოტკბო გემო აქვს“.

🔗 დეტალური სპეციფიკაცია ხელმისაწვდომია საქპატენტის ვებგვერდზე:https://www.sakpatenti.gov.ge/ka/state_registry/

დღევანდელი მონაცემებით, საქართველოში რეგისტრირებულია 44 ადგილწარმოშობის დასახელება და 32 გეოგრაფიული აღნიშვნა, რაც ხელს უწყობს ქართული პროდუქტის იდენტობის დაცვასა და კონკურენტუნარიანობის ზრდას როგორც შიდა, ისე საერთაშორისო ბაზრებზე.