🔹 შსს-მ პროსტიტუციის ხელშეწყობის ფაქტზე 12 პირი დააკავა – დახურულია 13 ობიექტი

შინაგან საქმეთა სამინისტროს ცენტრალური კრიმინალური პოლიციის დეპარტამენტის ორგანიზებულ დანაშაულთან ბრძოლის მთავარი სამმართველოს ხელმძღვანელმა, თორნიკე მარსაგიშვილმა ბრიფინგზე განაცხადა, რომ თბილისსა და სამეგრელოს რეგიონში, მოსამართლის განჩინების საფუძველზე, ბოლო 24 საათში ჩატარებული მასშტაბური ოპერაციის შედეგად, პროსტიტუციის ხელშეწყობისა და პროსტიტუციისთვის ადგილის გადაცემის ბრალდებით 12 პირი დააკავეს, ხოლო 13 ობიექტი დაიხურა.

დაკავებულთა შორის არიან როგორც საქართველოს, ასევე ჩინეთის მოქალაქეები.

გამოძიების ფარგლებში ჩატარებული ფარული საგამოძიებო მოქმედებების შედეგად დადგინდა, რომ ობიექტების მენეჯერები და ადმინისტრატორები სისტემურად უწყობდნენ ხელს პროსტიტუციაში ჩაბმულ ქალებს – მათ საცხოვრებელ ან სამუშაო ფართებს გადასცემდნენ ქირის სანაცვლოდ, ეხმარებოდნენ კლიენტების მოძიებაში და სექსუალური მომსახურებიდან მიღებულ ანაზღაურებას ნაწილობრივ იღებდნენ.

დეტალურად დადასტურდა, რომ ობიექტების ძირითადი შემოსავალი სწორედ პროსტიტუციის ხელშეწყობით მიღებული თანხა იყო. საგამოძიებო მოქმედებების შედეგად ამოღებულია ფული, რომელიც სავარაუდოდ აღნიშნული დანაშაულებრივი საქმიანობიდან იყო მიღებული.

გამოძიება საქართველოს სისხლის სამართლის კოდექსის 254-ე მუხლით გრძელდება, რაც 4 წლამდე ვადით თავისუფლების აღკვეთას ითვალისწინებს.