🔹 შინაგან საქმეთა სამინისტრომ ორგანიზებული დანაშაულის წინააღმდეგ მასშტაბური ოპერაცია ჩაატარა

შსს-ს ინფორმაციით, ჩატარებული კომპლექსური ღონისძიებების შედეგად, „ქურდული სამყაროს წევრობისა“ და „ქურდული სამყაროს საქმიანობის მხარდაჭერის“ ბრალდებით დაკავებულია 34 პირი, ხოლო 7 პირს, მათ შორის ერთ „კანონიერ ქურდს“, ბრალი დაუსწრებლად წარედგინა.

ოპერაციის დროს, ლაგოდეხის რაიონში დაკავებისას შეიარაღებულმა პირმა პოლიციელებს ცეცხლი გაუხსნა, რა დროსაც დაიჭრა სპეცრაზმელი, ხოლო დამნაშავე მირზა ალიევი ადგილზე ლიკვიდირდა.

შსს-ს ინფორმაციით, დაკავებულები მოქალაქეებს შორის ფინანსურ დავებში ჩაერეოდნენ, აწყობდნენ ე.წ. ქურდულ გარჩევებს, სთხოვდნენ ფულს და სიცოცხლის მოსპობით ემუქრებოდნენ.

ჩხრეკებისას ამოღებულია იარაღი, ნარკოტიკები, ფული და მობილური მოწყობილობები, რომლითაც ისინი „კანონიერ ქურდებს“ უკავშირდებოდნენ.

გამოძიება მიმდინარეობს საქართველოს სისხლის სამართლის კოდექსის რამდენიმე მუხლით, რაც 15 წლამდე თავისუფლების აღკვეთას ითვალისწინებს.

შსს აგრძელებს უკომპრომისო ბრძოლას ორგანიზებული დანაშაულის წინააღმდეგ, – განაცხადა შინაგან საქმეთა მინისტრის მოადგილემ ალექსანდრე დარახველიძემ.