📸 საქართველოში ლეოპარდი მესამედ დააფიქსირეს – გადაშენებულად მიჩნეული მტაცებელი ალგეთის ეროვნულ პარკში გამოჩნდა

ლეოპარდი ბრაკონიერობის შედეგად გასული საუკუნის შუა წლებიდან საქართველოში აღარ იკვეთებოდა და გადაშენებულად ითვლებოდა. თუმცა, ალგეთის ეროვნულ პარკში მოქმედ კეთილშობილი ირმის საშენის 40-მდე ფოტოხაფანგიდან ორმა ჯიქის გადაადგილება ღობის პერიმეტრზე დააფიქსირა.

„სავარაუდოდ, ეს უნიკალური ცხოველი თრიალეთის ქედზე კარგა ხანია იმყოფება. ჯიქი ისეთი ფრთხილია, რომ ადამიანს გაურბის და იშვიათად იძენს ვიზუალურ კონტაქტს,“ – განაცხადა ველური ბუნების ეროვნული სააგენტოს უფროსმა, რევაზ ბეჟაშვილმა.

ირმის საშენი 72 ჰექტარ ფართობზეა გადაჭიმული, სრულად შემოღობილია და აღჭურვილია 40 ფოტოხაფანგითა და 30 ვიდეოკამერით. ეს ინფრასტრუქტურა ცხოველების დაცულ და კონტროლირებულ გარემოში ცხოვრებას უზრუნველყოფს. ღობის მიღმა კი ჯიქისთვის საკვები ბაზა — თხები, ირემი და სხვა ჯიშები — ბუნებრივადაა წარმოდგენილი.

„ეს ნიშნავს, რომ საქართველო რეალურად იქცევა იშვიათი სახეობებისთვის თავშესაფრად. ეს შემთხვევა მხოლოდ ეკოლოგიური ფაქტი კი არა, გარემოსდაცვითი პოლიტიკის შედეგიც არის,“ – აღნიშნა გურიელიძემ.

დღეს ქვეყანაში 100-ზე მეტი დაცული ტერიტორია ფუნქციონირებს, 6 სხვადასხვა კატეგორიაში, საერთო ფართობით 929 996 ჰა. გარემოს დაცვის ეროვნული გეგმის ფარგლებში დაგეგმილია:

• 4 ახალი დაცული ტერიტორიის შექმნა სამეგრელოში, სვანეთში, კახეთსა და გურიაში
• რაჭის დაცული ტერიტორიების გაფართოება

🟢 ლეოპარდის დაბრუნება მხოლოდ ერთი ცხოველის გამოჩენა არ არის – ეს ჩვენთვის მინიშნებაა, რომ სწორი გარემოს დაცვითი პოლიტიკა რეალურ შედეგს იძლევა.
დავიცვათ ჩვენი ბიომრავალფეროვნება- ეს ჩვენი ბუნებრივი მემკვიდრეობაა.