📚 „ხაშურის წიგნის ფესტივალი“ 12 ივნისს, დიმიტრი ყიფიანის სახელობის სკვერში, წიგნის მოყვარულებს უმასპინძლებს 📚

2026 წლის 12 ივნისს ხაშურში, დიმიტრი ყიფიანის სახელობის სკვერში, გაიმართება „ხაშურის
წიგნის ფესტივალი“ – მასშტაბური კულტურულ-საგანმანათლებლო ღონისძიება, რომელიც
წიგნის, ლიტერატურისა და კითხვის პოპულარიზაციას ემსახურება.
ფესტივალი 12:00 საათზე გაიხსნება და 18:00 საათამდე მრავალფეროვანი პროგრამით
გაგრძელდება. ღონისძიება გააერთიანებს გამომცემლებს, მწერლებს, მკითხველებსა და წიგნის
მოყვარულებს. ფესტივალში მონაწილეობას მიიღებს ათზე მეტი გამომცემლობა, რომლებიც
დამთვალიერებლებს მრავალფეროვან ლიტერატურას, ახალ გამოცემებსა და სპეციალურ
შეთავაზებებს წარუდგენენ.
ფესტივალის ფარგლებში გაიმართება წიგნების პრეზენტაციები, ავტორებთან შეხვედრები და
დისკუსიები. სტუმრებს შესაძლებლობა ექნებათ შეხვდნენ თანამედროვე ქართველ მწერლებს,
გაეცნონ მათ შემოქმედებას და მონაწილეობა მიიღონ ლიტერატურულ ღონისძიებებში.
ფესტივალის განსაკუთრებული სტუმარი იქნება საფრანგეთიდან მოწვეული ლორენც
გერლახი (Lorenz Gerlach), გამომცემლობა DIDIER-ს წარმომადგენელი, რომელიც ქართველ
მკითხველს გამომცემლობის საგანმანანთლებლო სიახლეებსა და გამოწვევებზე ესაუბრება.
ღონისძიების მნიშვნელოვანი ნაწილი დაეთმობა საბავშვო პროგრამას. ბავშვებისთვის
დაგეგმილია შემეცნებითი და შემოქმედებითი ვორქშოფები, მათ შორის: „დეკუპაჟი –
დიზაინერული ხრიკები“, „მეცნიერების სახალისო ლაბორატორია“, „ისწავლე თამაშით“ და
„შენი ფერადი სამყარო“. პროგრამა მიზნად ისახავს ბავშვებში შემოქმედებითი აზროვნების,
ინტერესისა და კითხვის კულტურის წახალისებას. დღის განმავლობაში პატარებს შეხვდებიან
საყვარელი ანიმაციური პერსონაჟები – ბაჭია ლოლი, პანდა და სონიკი.
„ხაშურის წიგნის ფესტივალი“ წარმოადგენს კულტურულ სივრცეს, სადაც წიგნი, განათლება
და შემოქმედება ერთიანდება და სხვადასხვა ასაკის სტუმრებს საინტერესო და
მრავალფეროვან გამოცდილებას სთავაზობს. ღონისძიებაზე დასწრება თავისუფალია.
ფესტივალის ორგანიზატორია საქართველოს წიგნის გამომცემელთა და გამავრცელებელთა
ასოციაცია. ღონისძიების მხარდამჭერია საქართველოს კულტურის სამინისტრო,
შემოქმედებითი საქართველო და ხაშურის მუნიციპალიტეტის მერია.