ჩანაცვლებითი თერაპიის პასუხისმგებლობას ხვალიდან სახელმწიფო მთლიანად იღებს

ხვალიდან, 15 აგვისტოდან, ე.წ. ჩანაცვლებითი თერაპიის განხორციელებაზე პასუხისმგებლობას სრულად სახელმწიფო იღებს — ამის შესახებ საქართველოს ჯანდაცვის მინისტრმა მიხეილ სარჯველაძემ უწყებაში გამართულ ბრიფინგზე განაცხადა.

მინისტრის თქმით, კერძო მიმწოდებლების ბენეფიციარების უმეტესობა უკვე სახელმწიფო სერვისს მიმართა და ხვალიდან შეძლებს მათ მიერ არჩეულ სახელმწიფო ცენტრებში უფასო მომსახურების მიღებას.

📌 მთავარი მონაცემები:

• სახელმწიფო პროგრამაში უკვე დარეგისტრირებულია 1 512 ბენეფიციარი.
• დაახლოებით 100 პირს მომსახურება ვერ გაეწევა — ძირითადად იმ შემთხვევაში, თუ ისინი ინციდენტურად, და არა რეგულარულად, მოიხმარდნენ ნარკოტიკულ საშუალებებს, ან არსებობდა დუბლირებული რეგისტრაციები ორ კერძო მიმწოდებელთან.
• ბენეფიციარებს მოუწოდებენ დაიცვან ინსტრუქციები და ცენტრში მისვლისას იქონიონ პირადობის დამადასტურებელი დოკუმენტი.

მინისტრის განცხადებით, იმ პირებს, ვისაც ობიექტური მიზეზების გამო ვერ მიუთითეს სახელმწიფო სერვისზე, შესაძლებლობა ექნებათ 22 აგვისტოს ჩათვლით გამარტივებული პროცედურებით ჩაერთონ პროგრამაში.

ასევე იგეგმება იმ ექიმებისა და ექთნების დასაქმება, რომლებიც ადრე კერძო ცენტრებში მუშაობდნენ (დაახლოებით 60 ექიმი და შესაბამისი რაოდენობის ექთნები).

სარჯველაძის თქმით, მომავალში გაგრძელდება სფეროს რეფორმირება — მათ შორის ინფრასტრუქტურის მოწესრიგება და მკურნალობის წარმატებულობისთვის საჭირო ღონისძიებების დახვეწა.

„მინდა წარმატება ვუსურვო თითოეულ ბენეფიციარს, რომ შეძლონ დაამარცხონ ის მძიმე სენი, რასაც ჰქვია ნარკოდამოკიდებულება და ამისთვის სახელმწიფო ძალისხმევას ნამდვილად არ დაიშურებს,“ – აღნიშნა მინისტრმა.