ქვემო ქართლში უკანონო ხე-ტყის მოპოვების ფაქტი ვიდეოხაფანგმა დააფიქსირა
ქვემო ქართლის სატყეო სამსახურმა ბოლნისი–დმანისის სატყეო უბანზე ხე-ტყის უკანონო მოპოვებისა და ტრანსპორტირების ფაქტი გამოავლინა. ადგილობრივმა მკვიდრმა სახელმწიფო ტყეში უკანონოდ მოიპოვა დაახლოებით 5 კუბურ მეტრამდე რცხილას პირველი ხარისხის მორი.
სამართალდარღვევა დაფიქსირდა ტყეში განთავსებული ვიდეოხაფანგით, რის შემდეგაც სატყეო სამსახურის თანამშრომლებმა ოპერატიული რეაგირება მოახდინეს. ავტომანქანა დაილუქა, ხოლო უკანონოდ მოპოვებული ხე-ტყე გადატანილია დმანისის „საქმიან ეზოში“.
საქმეში სისხლის სამართლის დანაშაულის ნიშნების არსებობის გამო, მასალები საგამოძიებო უწყებას გადაეგზავნა.
ეროვნული სატყეო სააგენტოს განცხადებით, უკანონო ტყეთუმეთის წინააღმდეგ ბრძოლა პრიორიტეტულია – სახელმწიფო ტყეში კონტროლი ხორციელდება 750 ფოტოხაფანგით, ასევე დრონებისა და სამხრე კამერების საშუალებით.
ინფორმაციას ეროვნული სატყეო სააგენტო– ავრცელებს.