სამშენებლო სექტორში დასაქმების რეესტრში დარღვევების გამო 147 მეწარმე სუბიექტი დაჯარიმდა – შემოსავლების სამსახური მონიტორინგს აგრძელებს

მიმდინარე წლის ივლისის მონაცემებით, ფინანსთა სამინისტროს შემოსავლების სამსახურის საგადასახადო მონიტორინგის დეპარტამენტმა სამშენებლო სექტორში 589 მეწარმე სუბიექტი გადაამოწმა, რის შედეგადაც გამოვლინდა, რომ 147 სუბიექტი არასწორად აწარმოებდა დაქირავებულ პირთა რეესტრს.

კონკრეტულად, რეესტრში ასახვის გარეშე დასაქმებული აღმოჩნდა 566 პირი. დარღვევების გამოვლენის შემდეგ, შესაბამის სუბიექტებს საქართველოს საგადასახადო კოდექსის შესაბამისად სანქციები დაეკისრათ.

შემოსავლების სამსახური კვლავ მოუწოდებს ეკონომიკური საქმიანობის განმახორციელებელ პირებს, დაიცვან მოქმედი კანონმდებლობა და დაქირავებულ პირებთან შრომითი ურთიერთობის დაწყებისთანავე მოახდინონ მათი ასახვა რეესტრში.
აღსანიშნავია, რომ საქართველოს საგადასახადო კოდექსის მე-12 მუხლის საფუძველზე, დაქირავებულ პირთა რეესტრში ასახული მონაცემების სისწორე საგანგებო მონიტორინგის საგანია.

📌 შემოსავლების სამსახური კიდევ ერთხელ შეგახსენებთ, რომ რეესტრის არასათანადო წარმოება ზრდის გადასახადების გადაუხდელობის რისკებს და იწვევს ადმინისტრაციულ პასუხისმგებლობას.