რუსთავის სკოლის მოსწავლე გაეროს მოდელირების კონფერენციის გამარჯვებულია
რუსთავის N23 საჯარო სკოლის მე-11 კლასის მოსწავლე ბარბარე გოგინაშვილი გაეროს მოდელირების კონფერენციის (Model United Nations) გამარჯვებული გახდა.
კონფერენცია 13–14 დეკემბერს თბილისში, ახალგაზრდობის სააგენტოს ორგანიზებით გაიმართა და მასში საქართველოს სხვადასხვა რეგიონის სკოლის მოსწავლეები მონაწილეობდნენ. მონაწილეები გაეროს ფორმატით მუშაობდნენ, განიხილავდნენ საერთაშორისო საკითხებს და დებატებში მონაწილეობდნენ.
ბარბარე კონფერენციაზე კანადის დელეგატის როლში წარდგა და გამორჩეული გამოსვლით გამარჯვება მოიპოვა. მიღწევის შედეგად, მან საგზური მოიპოვა საერთაშორისო ფინალურ ეტაპზე, რომელიც 2026 წელს ნიუ-იორკში, გაეროს შტაბ-ბინაში გაიმართება. მონაწილეობა სრულად დაფინანსებული იქნება.