მკაცრი კონტროლი ჰაერის დაბინძურების წინააღმდეგ – ივნისში გამონაბოლქვის 475 სამართალდარღვევა გამოვლინდა
გარემოსდაცვითი ზედამხედველოსბის დეპარტამენტი ინფორმაციით – 2025 წლის 1 ივნისიდან 30 ივნისის ჩათვლით, ავტოსატრანსპორტო საშუალებების გამონაბოლქვის დადგენილ ნორმასთან შეუსაბამობის 475 ფაქტი გამოავლინეს.
ყველაზე მეტი, 215 სამართალდარღვევა გამოვლინდა თბილისში, 99 – ქუთაისში, 91 – ბათუმში, 70 კი – რუსთავში.
475 სამართალდარღვევიდან 415 ფიზიკური პირის მიერაა ჩადენილი, 60 შემთხვევაში კი, გარემოსდაცვითი ზედამხედველობის დეპარტამენტის თანამშრომლებმა იურიდიული პირები დააჯარიმეს.
აღსანიშნავია, რომ 270 სამართალდარღვევა მსუბუქი ავტომობილების, 185 – მიკროავტობუსის, 19 სატვირთო ავტომობილის, 1 კი ავტობუსის მძღოლების/მფლობელების მიერააა ჩადენილი.
გარემოსდაცვითი ზედამხედველობის დეპარტამენტის თანამშრომლებმა, მიმდინარე წლის 6 თვეში, ავტოსატრანსპორტო საშუალებების გამონაბოლქვის დადგენილ ნორმასთან შეუსაბამობის 2415 ფაქტი გამოავლინეს.
ატმოსფერული ჰაერის ხარისხის გაუმჯობესების მიმართულება დეპარტამენტისთვის პრიორიტეტია. შესაბამისად, არაერთი მიზნობრივი ღონისძიება ხორციელდება. ქვეყნის 4 მსხვილ ქალაქში მოძრავი ავტოსატრანსპორტო საშუალებების ხილული გამონაბოლქვის კონტროლი მიმდინარეობს. პარალელურად, დეპარტამენტი ავტოგასამართ სადგურებზე საწვავის ხარისხსაც რეგულარულად აკონტროლებს, რათა მინიმუმამდე შემცირდეს არაკონდიციური საწვავის მოხმარება, რაც, თავის მხრივ, მნიშვნელოვნად ამცირებს ატმოსფერულ ჰაერში მავნე ნივთიერებათა გაფრქვევას. გარდა ამისა, საწარმოებიდან დაბინძურების პრევენციის მიზნით, ჰაერში მავნე ნივთიერებების გაფრქვევის უწყვეტი თვითმონიტორინგის სისტემის დანერგვის პროცესი აქტიურად მიმდინარეობს. 36 უმსხვილეს საწარმოს სისტემა უკვე დანერგილი აქვს. კომპლექსური ღონისძიებები ატმოსფერული ჰაერის დაბინძურების მინიმუმამდე დაყვანას უწყობს ხელს.
- გარემოსდაცვითი ზედამხედველობის დეპარტამენტი აგრძელებს აქტიურ კონტროლს ატმოსფერული ჰაერის ხარისხის გაუმჯობესების მიზნით. მხოლოდ ივნისში ავტოსატრანსპორტო საშუალებების გამონაბოლქვის 475 ფაქტი დაფიქსირდა, ხოლო 2025 წლის პირველ ნახევარში – 2415 ფაქტი. მიზნობრივი ღონისძიებები, მათ შორის საწვავის ხარისხის კონტროლი და საწარმოებში თვითმონიტორინგის სისტემების დანერგვა, ხელს უწყობს გარემოს დაცვას და დაბინძურების შემცირებას.
