ირაკლი კობახიძე თურქმენეთში საერთაშორისო ფორუმში მონაწილეობს

საქართველოს პრემიერ-მინისტრი ირაკლი კობახიძე, მაკა ბოჭორიშვილთან და ლევან ჟორჟოლიანთან ერთად, გუშინ გაემგზავრა თურქმენეთში, სადაც მშვიდობისა და ნდობის საერთაშორისო წლისადმი მიძღვნილ ფორუმში მიიღებს მონაწილეობას.

კობახიძე ფორუმზე სიტყვით გამოვა. საერთაშორისო ღონისძიება 11-12 დეკემბერს, აშხაბადში ტარდება და თურქმენეთის ნეიტრალიტეტის 30 წლის იუბილეს ეძღვნება.

ფორუმში მონაწილეობენ თურქმენეთის, რუსეთის, სომხეთის, ყირგიზეთის, ტაჯიკეთის, უზბეკეთისა და ერაყის პრეზიდენტები, ასევე აზერბაიჯანის, უნგრეთის, საქართველოსა და პაკისტანის პრემიერ-მინისტრები.