🟦 გაფართოებული ფორმატით შეხვედრა შს მინისტრებს შორის – საქართველო და თურქეთი საპოლიციო პარტნიორობის გაღრმავებაზე თანხმდებიან

საქართველოს შინაგან საქმეთა მინისტრმა, გეკა გელაძემ, ოფიციალური ვიზიტით ქვეყანაში მყოფ თურქეთის რესპუბლიკის შინაგან საქმეთა მინისტრ ალი იერლიქაიასთან გაფართოებულ ფორმატში შეხვედრა გამართა.

შეხვედრაზე მხარეებმა ორ ქვეყანას შორის სამართალდამცავ სტრუქტურებში არსებული მჭიდრო და ნაყოფიერი თანამშრომლობა განიხილეს. ხაზი გაესვა პარტნიორობის გაღრმავების მნიშვნელობას სხვადასხვა მიმართულებით — განსაკუთრებით, ოპერატიული თანამშრომლობის, გამოცდილების გაზიარებისა და ერთობლივი უსაფრთხოების ღონისძიებების სფეროში.

მინისტრმა გელაძემ აღნიშნა, რომ საქართველოს შინაგან საქმეთა სამინისტრო მზად არის გააგრძელოს აქტიური თანამშრომლობა თურქ კოლეგებთან და კიდევ უფრო გააუმჯობესოს მექანიზმები, რომლებიც უწყებებს შორის ეფექტიან კომუნიკაციას და ერთობლივ ოპერაციებს უზრუნველყოფს.

შეხვედრას ესწრებოდნენ ორივე ქვეყნის მაღალი თანამდებობის პირები, მათ შორის — თურქეთის ეროვნული პოლიციის უფროსი მაჰმუთ დემირთაში, საქართველოს შს მინისტრის პირველი მოადგილე როლანდ მესხი და მინისტრის სხვა მოადგილეები.

შეხვედრის ბოლოს, გეკა გელაძემ თურქ კოლეგას მადლობა გადაუხადა ნაყოფიერი თანამშრომლობისთვის და ხაზი გაუსვა სამომავლო ერთობლივი პროექტების მნიშვნელობას.