📰 ოპიოიდური ჩანაცვლებითი მკურნალობის რეფორმის პირველი ეტაპი წარმატებით დასრულდა

ოპიოიდური დამოკიდებულების ჩანაცვლებითი მკურნალობის პროგრამის რეფორმის პირველი ეტაპი დასრულდა და ჯანდაცვის სფეროს წარმომადგენლები უკვე დარწმუნებით აცხადებენ, რომ ცვლილებები წარმატებით განხორციელდა.

ჯანმრთელობის სამინისტროს ინფორმაციით, რეფორმის ფარგლებში კერძო მიმწოდებლებისგან სახელმწიფო პროგრამაში გადმოვიდა დაახლოებით 1800 ბენეფიციარი.

ამ პროცესმა გამოავლინა მთელი რიგი სისტემური პრობლემები, რაც კიდევ ერთხელ მოწმობს, რომ რეფორმა არა მხოლოდ დროული, არამედ აუცილებელი იყო. კერძოდ:

• დაახლოებით 200 ბენეფიციარმა პირველივე დღიდან სამჯერად შემცირებული დოზები მოითხოვა, რაც მიუთითებს, რომ წარსულში მათ შესაძლოა არასწორად ჰქონდათ დანიშნული პრეპარატების რაოდენობა;
• ოთხი კერძო მიმწოდებლის შემთხვევაში, საშუალო დოზა საგრძნობლად აღემატებოდა ზოგად მაჩვენებელს – ზოგად საშუალო 11.5 მილიგრამთან შედარებით, ამ დაწესებულებებში დოზები 15-დან 19 მილიგრამამდე მერყეობდა;
• პროგრამაში ჩართულნი იყვნენ ინციდენტური მომხმარებლები – პირები, რომლებიც მხოლოდ ხანდახან მოიხმარდნენ ნარკოტიკს და რეალურად, მკურნალობა არ სჭირდებოდათ;
• დაფიქსირდა ნარკოტიკის გატანის მცდელობის არაერთი შემთხვევა, ასევე – ერთი და იმავე პირის ერთდროული რეგისტრაცია რამდენიმე დაწესებულებაში, რაც სისტემის სერიოზული ხარვეზების მანიშნებელია.

აღნიშნული პრაქტიკა რადიკალურად შეიცვალა რეფორმის შედეგად, რაც, ჯანდაცვის უწყების განმარტებით, მიუთითებს იმაზე, რომ პროგრამა სწორად დაიგეგმა და შედეგიანი აღმოჩნდა.

ფსიქიკური ჯანმრთელობისა და ნარკომანიის პრევენციის ცენტრის გუნდი მნიშვნელოვან როლს ასრულებდა პროცესის წარმატებით განხორციელებაში. განსაკუთრებული მადლობა გადაეცა ცენტრის ხელმძღვანელს, ლევან ჩაკვეტაძეს, რომელმაც საკუთარი გადაწყვეტილებით, რეფორმის ამ ეტაპის დასრულებამდე მაინც გააგრძელა ხელმძღვანელობა და პროცესის წარმატებულად დასრულება უზრუნველყო.

რეფორმის ამ ეტაპის დასრულების შედეგად, უახლოეს დღეებში გამოცხადდება კონკურსი ახალი სამედიცინო პერსონალის – ექიმებისა და ექთნების დასამატებლად. პრიორიტეტი მიენიჭებათ იმ პირებს, ვინც მუშაობდნენ ოპიოიდური ჩანაცვლების თერაპიის კერძო მიმწოდებლებთან და სურთ სახელმწიფო სისტემაში მუშაობის გაგრძელება.

ჯანდაცვის უწყება აცხადებს, რომ რეფორმა მომავალშიც გაგრძელდება და ეს იქნება მნიშვნელოვანი ნაბიჯი ნარკომანიის წინააღმდეგ ბრძოლისა და მკურნალობის ხარისხის გაუმჯობესების გზაზე.