📌 საოლქო საარჩევნო კომისიები საუბნო კომისიების ხელმძღვანელებსა და წევრებს ირჩევენ

დღეს ქვეყნის მასშტაბით საოლქო საარჩევნო კომისიები საუბნო საარჩევნო კომისიების ხელმძღვანელ პირებსა და წევრებს ირჩევენ. ჯამში, უნდა შეირჩეს 9 153 ხელმძღვანელი პირი და 15 255 წევრი.

კონკურსში მონაწილეობის მსურველებს განცხადების წარდგენის შესაძლებლობა 11-14 აგვისტოს ჰქონდათ, როგორც საოლქო საარჩევნო კომისიებში, ასევე ელექტრონული პლატფორმის – Konkursi.cec.gov.ge – საშუალებით. პროცედურების გამარტივების მიზნით, ცესკომ სპეციალური სარეკომენდაციო ფორმა მოამზადა, რომელიც ხელმისაწვდომი იყო როგორც საოლქო კომისიებში, ასევე ცესკოს ვებგვერდზე.

სულ 24 314 განაცხადი შემოვიდა, მათგან 9 117 – ხელმძღვანელი პოზიციებისთვის, ხოლო 15 197 – წევრობისთვის.

ცენტრალური საარჩევნო კომისია საოლქო კომისიებს მოუწოდებს, კანდიდატების შერჩევისას გაითვალისწინონ ისეთი კრიტერიუმები, როგორიცაა: პროფესიული და საარჩევნო გამოცდილება, მიუკერძოებელი მუშაობის გამოცდილება ადმინისტრაციაში, ასევე მონაწილეობა საარჩევნო ადმინისტრაციის საგანმანათლებლო პროექტებში.

კანონის შესაბამისად, საოლქო კომისიები მხოლოდ სერტიფიცირებულ წევრებს ირჩევენ. სერტიფიკატის ფლობა სავალდებულოა ყველა არჩეული წევრისთვის. კანდიდატთა მაქსიმალური ხელშეწყობის მიზნით, საარჩევნო ადმინისტრაციამ 2023 წლიდან არაერთხელ ჩაატარა სერტიფიცირების გამოცდები, მათ შორის ეთნიკური უმცირესობებისთვის ნათარგმნი ტესტების გამოყენებით. გამოცდები წელსაც გაიმართა, ასევე განხორციელდა საგანმანათლებლო და სასწავლო პროექტები, რომელთა მიზანიც პოტენციური წევრების ინფორმირება და შესაძლებლობების გაუმჯობესება იყო.