გარემოს დაცვისა და სოფლის მეურნეობის სამინისტროს მხარდაჭერით, გარემოსდაცვითი ინფორმაციისა და განათლების ცენტრში, სკოლის მოსწავლეებთან გაიმართა შეხვედრა გარემოს დაცვისა და ნარჩენების მართვის თემებზე.
შეხვედრის მიზანი იყო ნარჩენების მართვის ეროვნული პოლიტიკის გაცნობა და პლასტმასის ნარჩენებით გარემოს დაბინძურების შემცირების აუცილებლობაზე მსჯელობა.
მოსწავლეებთან ერთად შეხვედრაში მონაწილეობდა სამინისტროს ნარჩენებისა და ქიმიური ნივთიერებების მართვის პოლიტიკის დეპარტამენტის ხელმძღვანელი ლაშა ინაური, რომელმაც დეტალურად ისაუბრა პლასტმასის ჭარბი გამოყენების ზეგავლენაზე ადამიანის ჯანმრთელობასა და გარემოზე, ქვეყნის წინაშე არსებულ გამოწვევებსა და ამ მიმართულებით გადადგმულ ნაბიჯებზე.
ლაშა ინაურმა ხაზი გაუსვა ახალგაზრდების ჩართულობის მნიშვნელობას გარემოსდაცვით საკითხებში:
„მნიშვნელოვანია, რომ სკოლიდანვე ჩამოუყალიბდეთ მოსწავლეებს წარმოდგენა იმაზე, თუ რამდენად სერიოზული პრობლემაა ნარჩენების დაგროვება და პლასტმასით დაბინძურება. გარემოსდაცვითი ცნობიერების ამაღლება ადრეული ასაკიდან უნდა დაიწყოს, რათა მომავალში თითოეული მათგანი გახდეს პასუხისმგებელი მოქალაქე.“
მოსწავლეებმა აქტიურად მიიღეს მონაწილეობა დისკუსიაში, დასვეს კითხვები და გამოთქვეს საკუთარი მოსაზრებები ეკოლოგიურად სუფთა ცხოვრების წესის პოპულარიზაციისა და ნარჩენების შემცირების გზებზე.
შეხვედრა დასრულდა შეთანხმებით, რომ თითოეული მონაწილე საკუთარ ყოველდღიურ ცხოვრებაში გაატარებს მცირე, მაგრამ მნიშვნელოვან ცვლილებას – ნარჩენების შემცირებისა და გადამუშავების ხელშეწყობის მიმართულებით. 🌿
