სახელმწიფო უსაფრთხოების სამსახურის ახალ უფროსად მამუკა მდინარაძე დაინიშნა
საქართველოს პრემიერ-მინისტრმა ირაკლი კობახიძემ სახელმწიფო უსაფრთხოების სამსახურის ახალ უფროსად მამუკა მდინარაძე წარადგინა. პრემიერმა თანამშრომლებს მადლობა გადაუხადა სამსახურის ყოფილ ხელმძღვანელს, ანრი ოხანაშვილს, და აღნიშნა, რომ სახელმწიფო უსაფრთხოების სამსახურის გაძლიერება მთავრობის უმთავრესი პრიორიტეტია.
ირაკლი კობახიძის თქმით, ანრი ოხანაშვილმა სამსახურის განვითარებაში მნიშვნელოვანი წვლილი შეიტანა და იგი გამორჩეული კეთილსინდისიერებითა და პროფესიონალიზმით გამოირჩევა.
პრემიერმა მამუკა მდინარაძე მაღალი კვალიფიკაციის მქონე ლიდერად დაახასიათა, რომელსაც წლების განმავლობაში აქვს სამართალდამცავ სტრუქტურებში მუშაობის გამოცდილება. კობახიძის შეფასებით, სწორედ ეს გამოცდილება დაეხმარება მას უწყების ეფექტურად ხელმძღვანელობაში.
თავის მხრივ, სახელმწიფო უსაფრთხოების სამსახურის ახალმა უფროსმა მადლობა გადაუხადა მთავრობასა და პარლამენტს გამოცხადებული ნდობისთვის და ხაზი გაუსვა უწყების განსაკუთრებულ როლს ეროვნული უსაფრთხოების განმტკიცების პროცესში.
„ჩვენი ქვეყანა დღეს წარმატებით ცდილობს, მსოფლიო რუკაზე თავისი განსაკუთრებული ადგილი მოიპოვოს. ამ პროცესში სახელმწიფო უსაფრთხოების სამსახურს უდიდესი მნიშვნელობა ენიჭება და დარწმუნებული ვარ, თითოეული თანამშრომლის მხარდაჭერით, ჩვენ ამ ამოცანას წარმატებით გავართმევთ თავს,“ — განაცხადა მამუკა მდინარაძემ.
ყოფილმა ხელმძღვანელმა ანრი ოხანაშვილმა, რომელიც პრემიერ-მინისტრის მრჩევლად დაინიშნა ეროვნული უსაფრთხოების საკითხებში, მადლობა გადაუხადა პრემიერს და აღნიშნა, რომ მისთვის პატივი იყო ამ სამსახურში მუშაობა.
„ბატონ მამუკასთან ერთად საპარლამენტო საქმიანობის განმავლობაში არაერთ რთულ სიტუაციაში მოგვიწია მოქმედება. მჯერა, ის ღირსეულად გაუძღვება ამ სამსახურს,“ — აღნიშნა ოხანაშვილმა.