საქართველოში სოციალური შემწეობის სისტემის რეფორმა იგეგმება

საქართველოს მთავრობა სოციალური დახმარების სისტემის ცვლილებას გეგმავს. როგორც პრემიერ-მინისტრმა ირაკლი კობახიძემ პარლამენტში განაცხადა, დღეს შემწეობას ბევრად მეტი ადამიანი იღებს, ვიდრე რეალურად ცხოვრობს სიღარიბის ზღვარს მიღმა.

ბოლო მონაცემებით, სოციალური დახმარება ქვეყანაში 708 245 ადამიანს ეძლევა – მათ შორის 461 796 მხოლოდ საარსებო შემწეობას, ხოლო 246 449 დასაქმების ხელშეწყობის პროგრამაშია ჩართული.

სოციოლოგი პაატა აროშიძე მიიჩნევს, რომ ბენეფიციართა სია აუცილებლად გადასახედია, რადგან ბევრ ადამიანს რეალური, მაგრამ არააღრიცხული შემოსავალი აქვს. მისი თქმით, პროცესი მტკივნეული და ხანგრძლივი იქნება და 1–2 წელიწადში ვერ დასრულდება.

სოციოლოგ პაატა აროშიძის თქმით:

• საჭიროა კრიტერიუმების გამკაცრება და მეთოდოლოგიის დახვეწა;
• პროცესს არ უნდა ჰქონდეს პოლიტიკური შეფერილობა;
• სახელმწიფომ მეტი რესურსი უნდა ჩადოს დასაქმებასა და ბიზნესის ხელშეწყობაში, რათა მოქალაქეები სოციალური დახმარებაზე დამოკიდებული არ გახდნენ;
• განსაკუთრებით მნიშვნელოვანია შემოსავლების გამჭვირვალე შეფასება და ჩრდილოვანი შემოსავლების დროული აღმოჩენა.

სპეციალისტის თქმით, სისტემის შეცვლა აუცილებელია, რათა დახმარება მიიღონ მათ, ვისაც ყველაზე მეტად სჭირდება.