ნიტრატების მაჩვენებლის გასაზომად საეჭვო ხელსაწყოებს ნუ ენდობით — სურსათის ეროვნული სააგენტოს გაფრთხილება
ბაზარში თუ სუპერმარკეტში ხილსა და ბოსტნეულს ხშირად ამოწმებენ ე.წ. ხელსაწყოებით, რომლითაც თითქოს ნიტრატების დონეს იჭერენ. თუმცა, სურსათის ეროვნული სააგენტო ამბობს, რომ ეს მოწყობილობები სანდო არ არის და მომხმარებლის შეცდომაში შეყვანას ემსახურება.
▶️ როგორც უწყებაში აცხადებენ, ნიტრატებისა და სხვა მავნე ნივთიერებების შესამოწმებლად მხოლოდ აკრედიტებული ლაბორატორიების კვლევებია სარწმუნო — ეს ნიშნავს, რომ საჭიროა ISO სტანდარტების დაცვა და სწორად აღებული ნიმუშები.
🧪 სააგენტო ყოველწლიურად იღებს დაახლოებით 400 ნიმუშს და სხვადასხვა მაჩვენებელს ამოწმებს. მხოლოდ ივლისში ქვეყნის მასშტაბით 84 ნიმუში გამოიკვლიეს (საზამთრო, ნესვი, ვაშლი, ატამი, პომიდორი, კომბოსტო, ჭარხალი) და ამჯერად მხოლოდ კომბოსტოსა და ჭარხლის 4 ნიმუშში აღმოჩნდა ნიტრატების გადაჭარბებული დონე. ეს პროდუქტი უკვე ამოღებულია გაყიდვიდან.
💬 „მნიშვნელოვანია, მომხმარებელი სწორად ინფორმირდეს და გადაწყვეტილება მხოლოდ სანდო კვლევებზე დაყრდნობით მიიღოს,“ — აღნიშნავენ სააგენტოში.
📌 სურსათის ეროვნული სააგენტო აგრძელებს სეზონური პროდუქციის სისტემურ მონიტორინგს და კვლევის შედეგების შესახებ საზოგადოებას ინფორმაციას აწვდის.