მსოფლიო ბანკის და კონკურენციის საერთაშორისო ქსელის (ICN) მიერ GCCA-ს გადაწყვეტილებები, ფარმაციის სექტორში, საუკეთესოდ დასახელდა
საქართველოს კონკურენციისა და მომხმარებლის დაცვის სააგენტოს (GCCA) მიერ მიღებული გადაწყვეტილებები, ფარმაციის სექტორში და ქვეყანაში განხორციელებული რეფორმები, მსოფლიო ბანკის (World Bank Group) და კონკურენციის საერთაშორისო ქსელის (ICN) მიერ, საუკეთესოდ დასახელდა.
ნომინაციაში – კერძო ინვესტიციების, სამუშაო ადგილებისა და მომხმარებლის კეთილდღეობის ზრდისთვის მდგრადი კონკურენტული პროცესის მხარდაჭერა – გაიმარჯვა GCCA-ის ქეისმა, რომელიც ფარმაცევტულ ბაზარზე მონიტორინგის ფარგლებში, გაცემული რეკომენდაციების შედეგად განხორციელებულ რეფორმებს, შეთანხმებული ქმედებების გამოვლენის გადაწყვეტილებებს ეხებოდა – კერძოდ, GCCA-ს მიერ, ფარმაციის ბაზარზე 13 რეკომენდაცია გაიცა, რის საფუძველზეც საქართველოს მთავრობისა და ჯანდაცვის სამინისტროს მიერ განხორციელებული რეფორმების შესაბამისად, ქვეყანაში დაინერგა ელექტრონული რეცეპტის სისტემა, ამოქმედდა GMP და GDP სტანდარტი, დაინერგა რეფერენტული ფასი 7000-მდე მედიკამენტზე. შედეგად, რიგ მედიკამენტებზე ფასები შემცირდა და პაციენტებმა მნიშვნელოვანი დანაზოგის გაკეთება შეძლეს. 2023 წელს კი, GCCA-ს მიერ, 4 ფარმაცევტული კომპანია 53 მლნ. ლარით დაჯარიმდა – სახელმწიფოს მიერ, ონკოლოგიური მედიკამენტების შეძენის მიზნით, გამოცხადებულ კონკურსებში იდენტური ფასწარმოქმნის დაწესების გამო.
დაჯილდოება შოტლანდიის ქალაქ ედინბურგში, კონკურენციის საერთაშორისო ქსელის (ICN) 24-ე საერთაშორისო კონფერენციის ფარგლებში გაიმართა, რომელსაც GCCA-ის თავმჯდომარე, ირაკლი ლექვინაძე ესწრებოდა.
კონკურენციის საერთაშორისო ქსელი (ICN) 160-მდე ქვეყნის კონკურენციისა და ანტიმონოპოლიურ უწყებას აერთიანებს. 2025 წელს გამართულ საერთაშორისო კონფერენციას ესწრებოდნენ: 500-მდე დელეგატი, კონკურენციის საერთაშორისო ქსელის წევრები, სხვადასხვა ქვეყნის კონკურენციის უწყებების ხელმძღვანელი პირები, არასამთავრობო ორგანიზაციების წარმომადგენლები და დარგის ექსპერტები.
