თბილისის აეროპორტში ნარკოტიკის საქართველოში შემოტანის ბრალდებით, რუსეთის ფედერაციის მოქალაქე დააკავეს
შინაგან საქმეთა სამინისტროს ცენტრალური კრიმინალური პოლიციის დეპარტამენტის თანამშრომლებმა, განსაკუთრებით დიდი ოდენობით ნარკოტიკული საშუალებების უკანონო შეძენა-შენახვისა და საქართველოში შემოტანის ბრალდებით, 1989 წელს დაბადებული რუსეთის მოქალაქე ა.გ. დააკავეს.
სამართალდამცველებმა დაკავებულის სამგზავრო ჩანთაში, სპეციალურად მოწყობილი სამალავიდან, ამოიღეს 1 კილო და 200 გრამი კოკაინი, რომლის ღირებულება შავ ბაზარზე მილიონ ლარს აღემატება.
გამოძიება მიმდინარეობს საქართველოს სისხლის სამართლის კოდექსის 260-ე და 262-ე მუხლებით, რაც 20 წლამდე ან უვადო თავისუფლების აღკვეთას ითვალისწინებს.