გარემოს დაცვის ინსპექტორებმა კახეთსა და მცხეთა-მთიანეთში უკანონო საქმიანობის რამდენიმე ფაქტი გამოავლინეს
გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტის თანამშრომლებმა კახეთისა და მცხეთა-მთიანეთის რეგიონებში უკანონო სამართალდარღვევები გამოავლინეს.
➡️ თელავის მუნიციპალიტეტის სოფელ ართანაში მოქალაქეს საკარმიდამო ეზოში ლენტური ტიპის არარეგისტრირებული სახერხი საამქრო ჰქონდა მოწყობილი, რომელიც დაილუქა. ფაქტი სისხლის სამართლის დანაშაულის ნიშნებს შეიცავს და მასალები შესაბამის უწყებაში გადაეგზავნა.
➡️ თიანეთის მუნიციპალიტეტის სოფელ ბოჭორმას მიმდებარედ სახელმწიფო ტყის ტერიტორიაზე, ეროვნულ სატყეო სააგენტოს თანამშრომლებთან ერთად, კუსტარულად დამზადებული სანახშირე და 5 კუბური მეტრი ფოთლოვანი სახეობის საშეშე მერქანი ამოიღეს.
✅ გარემოსდაცვითი ზედამხედველობის დეპარტამენტი 24-საათიან უწყვეტ პატრულირებას ახორციელებს მთელი ქვეყნის მასშტაბით უკანონო ტყითსარგებლობის, ჰაერის დაბინძურების, ბრაკონიერობისა და სხვა გარემოსდაცვითი დარღვევების პრევენციის, აღკვეთისა და გამოვლენის მიზნით. სწრაფი რეაგირება ხდება ცხელ ხაზზე (153) შემოსულ შეტყობინებებზე.
