📚 განათლების სამინისტროს განმარტება კერძო რეპეტიტორობის საკითხზე

საქართველოს განათლების, მეცნიერებისა და ახალგაზრდობის მინისტრის მოადგილე ზვიად გაბისონიამ 9 ნოემბერს განმარტა, რომ ზოგადსაგანმანათლებლო დაწესებულებაში დასაქმებულ მასწავლებელს სკოლის გარეთ კერძო რეპეტიტორობის უფლება არ ეზღუდება. თუმცა, იმ შემთხვევაში, თუ პედაგოგი რეპეტიტორობას ახორციელებს ტრენინგ-ცენტრში ან მოსამზადებელ ცენტრში, მას ამისთვის სკოლის დირექტორის წერილობითი თანხმობა სჭირდება.

გაბისონიას განცხადებით, ეს მოთხოვნა გამომდინარეობს „კორუფციის წინააღმდეგ ბრძოლის შესახებ“ კანონში შეტანილი ცვლილებებიდან, რომლის თანახმადაც, საჯარო სკოლებში დასაქმებულ პედაგოგებს უფლება აქვთ განახორციელონ ანაზღაურებადი პედაგოგიური, სამეცნიერო, შემოქმედებითი ან სპორტული საქმიანობა შესაბამისი ხელმძღვანელის წერილობითი თანხმობის საფუძველზე.

👉 მინისტრის მოადგილის თქმით, დეზინფორმაციაა ის მტკიცება, თითქოს წერილობითი თანხმობის ვალდებულება ვრცელდებოდეს ე.წ. კერძო რეპეტიტორებზე:

„რეპეტიტორის ინსტიტუტს საქართველოს განათლების შესახებ მოქმედი კანონმდებლობა არ ცნობს, შესაბამისად, ასეთი საქმიანობა არ ითვლება პედაგოგიურ საქმიანობად.“

გაბისონიამ ასევე აღნიშნა, რომ მასწავლებლის ეთიკის კოდექსის მე-4 მუხლის მე-3 პუნქტით, მასწავლებელს ეკრძალება საკუთარ მოსწავლეს გაუწიოს ფასიანი საგანმანათლებლო მომსახურება, გარდა კანონით განსაზღვრული შემთხვევებისა.

მინისტრის მოადგილის თქმით, საქართველოს მთავრობის მიერ დაანონსებული განათლების ფუნდამენტური რეფორმის ერთ-ერთი მიზანი იქნება ისეთი სასკოლო მოდელის შექმნა, რომელიც მშობლებს კერძო რეპეტიტორებზე დამოკიდებულებას მოაშორებს.

📌 რაც შეეხება სამეწარმეო სუბიექტებს – ,,იმ იურიდიულ პირებს, რომლებიც საქართველოს სამეწარმეო კანონმდებლობით რეგისტრირებულნი არიან მეწარმე სუბიექტებად და ახორციელებენ სატრენინგო მომსახურებას, მათ შორის, ერთიანი ეროვნული გამოცდებისთვის განსაზღვრულ საგნებში, ასევე უცხო ენებში, მოეთხოვებათ დამსაქმებლის მხრიდან წერილობითი თანხმობის მიღება“, – განაცხადა ზვიად გაბისონიამ.