📌 სახელმწიფო უსაფრთხოების სამსახურის უფროსი სახალხო დამცველს შეხვდა

საქართველოს სახელმწიფო უსაფრთხოების სამსახურის უფროსი მამუკა მდინარაძე შეხვდა სახალხო დამცველს ლევან იოსელიანს. შეხვედრის მიზანი იყო ადამიანის უფლებებისა და უსაფრთხოების საკითხებზე მოლაპარაკება და არსებული ვითარების შეფასება.

სუს-ის ხელმძღვანელმა ომბუდსმენს სამსახურის სტრატეგიული პრიორიტეტები გააცნო. მხარეებმა დეტალურად განიხილეს საქართველოს ოკუპირებულ ტერიტორიებსა და საოკუპაციო ხაზის გასწვრივ არსებული მდგომარეობა, უსაფრთხოების გამოწვევები და ამ კონტექსტში ადამიანის უფლებების დაცვითი მექანიზმები.

🔹 შეხვედრაზე ხაზგასმით აღინიშნა სახელმწიფო უწყებებს შორის ურთიერთთანამშრომლობის მნიშვნელობა, ასევე განიხილეს სამომავლო გეგმები, რომლებიც ადამიანის უფლებების დაცვისა და უსაფრთხოების ეფექტიან უზრუნველყოფას ემსახურება.