საქართველომ 2026 წლის ზამთრის ოლიმპიადაზე პირველი ლიცენზია მოიპოვა
ბოსტონში ფიგურულ ციგურაობაში მსოფლიოს ჩემპიონატი მიმდინარეობს. მსოფლიოს პირველობაზე იასპარეზა ქართულმა სპორტულმა წყვილმა – ანასტასია მეტელკინამ და ლუკა ბერულავამ. მათ ორი პროგრამის შედეგად 202.21 ქულა დააგროვეს, მსოფლიოს პირველობა მეოთხე ადგილზე დაასრულეს და საქართველოს 2026 წლის ზამთრის ოლიმპიადაზე პირველი ლიცენზიაც მოუპოვეს.
ბერულავა-მეტელკინას წყვილმა მოკლე პროგრამაში 71,68 ქულა მიიღო და მეოთხე პოზიცია დაიკავა, თავისუფალ პროგრამაში კი 130,53 ქულა დაიმსახურა და მეექვსე შედეგი აჩვენა.
მამაკაცებს შორის მოკლე პროგრამით იასპარეზა ნიკა ეგაძემ. მან 90.39 ქულა დაიმსახურა და ამ ეტაპზე მეექვსე ადგილზეა. ნიკა თავისუფალი პროგრამით 30 მარტს იასპარეზებს. 28 მარტს რიტმული ცეკვით მაყურებლის წინაშე წარდგება დიანა დევისისა და გლებ სმოლკინის წყვილი. ჩემპიონატს გამოეთიშა ანასტასია გუბანოვა, რომელმაც თავისუფალ პროგრამაში გადასვლა ვერ შეძლო. მოკლე პროგრამაში მან 47,31 ქულა მიიღო, რაც 28-ე შედეგი აღმოჩნდა.
წელს ლუკა ბერულავასა და ანასტასია მატელკინას წყვილმა იუნიორთა შორის მსოფლიოს პირველობაზე ჩემპიონობა იზეიმა. ოქროს მედალი მათ ზედიზედ მეორედ მოიპოვეს. ლუკა ბერულავამ იუნიორთა შორის მსოფლიოს ჩემპიონატზე პირველი ოქროს მედალი 2022 წელს მოიპოვა. მისი მეწყვილე მაშინ კარინა საფინა იყო. ბერულავა-მეტელკინას წყვილმა წელს ევროპის ჩემპიონატზე ბრინჯაოს მედალიც დაიმსახურა. ქართული ფიგურული სრიალის ისტორიაში ანასტასია და ლუკა პირველი სპორტული წყვილია, რომელმაც ევროპის ვიცე-ჩემპიონის ტიტულის მოპოვება შეძლო. ვერცხლის მედალი მათ შარშან მოიპოვეს.
ქართველი სპორტსმენები მსოფლიოს ჩემპიონატზე საქართველოს სპორტის სამინისტროს მხარდაჭერით იმყოფებიან.
