დღეს საქართველოს მართლმადიდებელი ეკლესია 142-ე კათოლიკოს-პატრიარქს ირჩევს
გაფართოებული საეკლესიო კრება სამების საკათედრო ტაძარში 13:00 საათზე დაიწყება.
კრებას დაახლოებით 1 200 დელეგატი დაესწრება. პროგრამაში შედის:
- პატრიარქობის კანდიდატების გამოსვლები;
- ეპარქიების წარმომადგენელთა სიტყვები;
- ისტორიული მოხსენება პატრიარქის ტიტულის შესახებ;
- კენჭისყრა და შედეგების გამოცხადება.
პირდაპირ ეთერში გადაიცემა:
- კრების გახსნა,
- კენჭისყრის პროცესი,
- საბოლოო შედეგების გამოცხადება.
ხმის დათვლის ეტაპზე ტრანსლაცია შეწყდება. შედეგებს გამოაცხადებს მეუფე ანანია.
პატრიარქობის სამი კანდიდატია:
- მიტროპოლიტი შიო (მუჯირი) – სენაკისა და ჩხოროწყუს მიტროპოლიტი, საპატრიარქო ტახტის მოსაყდრე;
- მიტროპოლიტი იობი (აქიაშვილი) – მროველ-ურბნელი მიტროპოლიტი;
- მიტროპოლიტი გრიგოლი (ბერბიჭაშვილი) – ფოთისა და ხობის მიტროპოლიტი.
არჩევნებში მონაწილეობას მხოლოდ წმინდა სინოდის მღვდელმთავრები იღებენ. გამარჯვებისთვის საჭიროა ხმების ნახევარზე მეტი – მინიმუმ 20 ხმა. თუ პირველ ტურში ვერავინ მიიღებს საჭირო რაოდენობას, გაიმართება მეორე ტური ორ ლიდერ კანდიდატს შორის.
28 აპრილს ჩატარებულ შიდა კენჭისყრაში მეუფე შიომ 20 ხმა მიიღო, ხოლო მეუფე იობმა და მეუფე გრიგოლმა – თითოეულმა 7-7 ხმა.
ახალი პატრიარქის ინტრონიზაციის თარიღი დღესვე გამოცხადდება.
სრულიად საქართველოს 141-ე კათოლიკოს-პატრიარქი ილია II 17 მარტს, 93 წლის ასაკში გარდაიცვალა.