ბოლნისის მუნიციპალიტეტის მერიის ორგანიზებით სოფელ ტანძიაში ფესტივალი „საბაობა 2025“ აღინიშნა
ბოლნისის მუნიციპალიტეტმა მასპინძლობა გაუწია მრავალფეროვან კულტურულ და საგანმანათლებლო ღონისძიებას, რომელიც დიდი ქართველი მოაზროვნისა და მწერლის — სულხან-საბა ორბელიანის ხსოვნას მიეძღვნა.
ფესტივალის ფარგლებში, ბოლნელმა მთავარეპისკოპოსმა ეფრემმა წმინდა ნიკოლოზის სახელობის ეკლესიაში სულხან-საბა ორბელიანის სულის მოსახსენებელი პანაშვიდი გადაიხადა. ღონისძიებას მრავლად ესწრებოდნენ ადგილობრივი მაცხოვრებლები, სტუმრები და მუნიციპალიტეტის ხელმძღვანელი პირები.
ფესტივალის მონაწილეებს შესაძლებლობა ჰქონდათ, დაესწროთ თეატრალურ წარმოდგენას და მუსიკალურ კონცერტს, რომელშიც მონაწილეობდნენ ადგილობრივი ფოლკლორული და ქორეოგრაფიული ანსამბლები. განსაკუთრებული მოწონება დაიმსახურა საბავშვო სპექტაკლების სერიამ, რომელიც სულხან-საბა ორბელიანის იგავ-არაკების მიხედვით იყო დადგმული.
ღონისძიების ფარგლებში მოეწყო სახვითი და გამოყენებითი ხელოვნების ნიმუშების გამოფენა-გაყიდვაც, რაც ადგილობრივი ხელოვანებისთვის საკუთარი ნამუშევრების ფართო აუდიტორიისთვის გაცნობის კარგი შესაძლებლობა გახდა. სპორტის მოყვარულებისთვის კი გათვალისწინებული იყო შეჯიბრებები მკლავჭიდსა და ჭადრაკში.
ფესტივალის დასკვნით ნაწილში, ბოლნისის მუნიციპალიტეტის მერის მოვალეობის შემსრულებელმა, ბუბა გობეჯიშვილმა, ბოლნელ მთავარეპისკოპოს ეფრემთან ერთად, 2024-2025 სასწავლო წლის წარჩინებულ მოსწავლეებს სიმბოლური საჩუქრები გადასცა და მათ წარმატებები უსურვა მომავალი სწავლისა და კარიერული განვითარებში.
სულხან-საბა ორბელიანისადმი მიძღვნილი ფესტივალი ბოლნისში არა მხოლოდ ისტორიული მემკვიდრეობისა და კულტურული ფასეულობების გააზრებისა და პატივისცემის გამოვლინება იყო, არამედ ახალგაზრდების წახალისებისა და ადგილობრივი ხელოვნების პოპულარიზაციის მნიშვნელოვანი პლატფორმა. მსგავსი ღონისძიებები ხელს უწყობს ტრადიციებისა და განათლების ერთმანეთთან დაკავშირებას, რაც საზოგადოების ერთიანობასა და მომავალ თაობაზე ზრუნვას კიდევ უფრო ნათლად უსვამს ხაზს.
