ირაკლი კობახიძე: „ბორჯომის ახალი ქარხანა – სტაბილური შემოსავალი ასეულობით ოჯახისთვის და განვითარების ახალი პერსპექტივა მთელი რეგიონისთვის“

ბორჯომის ახალ ქარხანაში 600-მდე ადგილობრივი დასაქმდება, რაც პრემიერ-მინისტრის ირაკლი კობახიძის განცხადებით, არამხოლოდ ოჯახების სტაბილურ შემოსავალს, არამედ მთელი რეგიონის კეთილდღეობის ზრდასაც ნიშნავს.

პრემიერ-მინისტრმა ეს განცხადება „ბორჯომის“ ქარხნის გახსნის ღონისძიებაზე სიტყვით გამოსვლისას გააკეთა და პროექტს “უმნიშვნელოვანესი სოციალური ეფექტის მატარებელი” უწოდა.

„უმნიშვნელოვანესია ‘ბორჯომის’ ახალი პროექტის სოციალური ეფექტი – 600-მდე დასაქმებული ადგილობრივი ნიშნავს სტაბილურ შემოსავალს ამდენივე ოჯახისთვის და, ამავდროულად, კეთილდღეობისა და განვითარების ახალ პერსპექტივას მთელი რეგიონისთვის, ბორჯომის მუნიციპალიტეტისთვის“, – აღნიშნა პრემიერმა.

🏭 ირაკლი კობახიძემ ხაზი გაუსვა, რომ საქართველოს მთავრობის მიზანი სწორედ მდგრადი ეროვნული წარმოების განვითარებაა, რაც ქვეყანას დოვლათს შიგნით უქმნის და საერთაშორისო რეპუტაციას განამტკიცებს.

„ჩვენი მთავრობის პრიორიტეტია, მაქსიმალურად შევუწყოთ ხელი სწორედ ასეთი ეროვნული წარმოების განვითარებას, რომელიც ქმნის დოვლათს ქვეყნის შიგნით და საქართველოს უმკვიდრებს მაღალი ხარისხის მწარმოებელი ქვეყნის რეპუტაციას მსოფლიოს მასშტაბით“, – განაცხადა მან.

🙌 პრემიერ-მინისტრმა მადლობა გადაუხადა ყველა იმ ადამიანს, ვინც პროექტის განხორციელებაში მონაწილეობდა:

„მადლობას ვუხდი კომპანიის ხელმძღვანელობას, თითოეულ ინვესტორსა და თანამშრომელს ამ ეროვნული მნიშვნელობის საქმის წამოწყებისა და წარმატებით განხორციელებისთვის“, – აღნიშნა ირაკლი კობახიძემ.

🎯 პროექტის მიზანია, ქართული ბრენდის – „ბორჯომის“ – პოზიციების კიდევ უფრო განმტკიცება საერთაშორისო ბაზარზე, რაც ხელს შეუწყობს საქართველოს როგორც მაღალი ხარისხის პროდუქციის მწარმოებელი ქვეყნის იმიჯის გაძლიერებას.